Konsidera katak komisaun Interministeriál hanesan orgaun prinsipál hodi haree no garante dezenvolvimentu prosesu adezaun Timor-Leste nian ba Organizasaun Mundiál Komérsiu (OMK), no konsidera mós ba preparasaun Timor-Leste nian ba reuniaun negosiasaun nivel altu daruak nian ho país membru sira OMK nian.

Ho nunee, Governu Timor-Leste liu husi Ministériu Koordenador Assuntus Ekonómikus, ne’ebé lidera husi Ministru Eng. Joaquim Amaral, realiza reuniaun dahuluk komisaun Interministeriál no preparasaun timor-leste ba reuniaun negosiasaun nivel altu daruak ho país membru sira OMK nian. Objetivu husi reuniaun ida ne’e atu reafirma kompromisu Timor-Leste nian hodi sai membru iha OMK; atualizasaun Timor nia prosesu adezaun ba OMK; aprezentasaun ba dokumentu negosiasaun nian ne’ebé submete ona ba Sekretariadu nomós sirkula ona ba país membru sira OMK nian.

Dokumentu hirak ne’e Timor-Leste sei aprezenta, diskuti no negosia iha reuniaun negosiasaun nivel altu daruak nian hamutuk ho país membru sira OMK nian.Reuniaun refere hala’o iha edifisiu City 8 Manleuana, Dili, iha loron Tersa-feira 06 Jullu 2021, partisipa husi Ministru Turizmu, Komérsiu no Indústria, Dr. José Lucas do Carmo da Silva, Vise-Ministru Komérsiu no Indústria, Sr. Domingos Lopes Antunes, nomós membru Governu ho reprezentante instituisaun ne’ebé relevantes.

Mídia MTCI