Iha Sexta-Feira, 23 Jullu 2021; MTCI konvida Embaixador Japao nian, Sr. Masami Kinefuchi, ne’ebé akompaña husi nia espoza, no mos Country Director JICA nian ba Timor-Leste, Sr. Goto San, ba han kalan hamutuk ho Ministru Turizmu, Komérsiu no Indústria, Dr. José Lucas do Carmo da Silva, ne’ebé akompaña mós husi Vise-Ministra Turizmu Komunitáriu no Kulturál, Dra. Inácia da Conceição Teixeira, no Vise Ministru Komérsiu no Indústria, Sr. Domingos Lopes Antunes ho ekipa, iha Hotel Timor Dili.Han kalan hamutuk ne’e hala’o hanesan parte ida husi implementasaun ‘Resepsaun Ofisial Atendementu ho Parseiru Sira’.

Iha sorumutu refere iha mós diálogu informal entre parte rua hanesan parseiru ba dezenvolvimentu iha paíz Timor-Leste, no fahe informasaun sobre apoiu sira maka Governu Japoneze nian oferese ona mai Timor-Leste durante ne’e liu husi JICA, no mos atu explora oportunidade ruma ba posivel investimentu iha tempu oin mai. Durante konversa, nota katak, iha asuntu sira levanta inklui produtu no kualidade agríkola no oinsa hasae kualidade produtu, introduz produtu local ne’ebé iha potensialidade ba exportasaun hanesan maek no figus, survey ka estudu viavilidade, kria master plan sira liga ho projetu infra-estrutura no mos turizmu nian hanesan Atauro, Portu no Kuak 7 iha Venilale, kualidade tais no nia merkadu, no dezafiu sira iha area investimentu nian, no importante mos atu kontinua no aumenta apoiu iha kapasitasaun rekursu umanu, hanesan aumenta númeru bolseiru ba pesoal MTCI nian.Resposta interesante husi Governu Japoneze nian; primeiru, aleinde iha programa bolsu estudu, Governu Japoneze mos iha Program on the Job Training, implementasaun programa ne’e barak liu hala’o iha lingua Japoneza.

Governu Japoneze atraves de Ajensia Kooperasaun Internasional (JICA) iha prioridade tolu (socio-economic infrastructure, industrial diversification, and social service delivery), no kontinua apoiu ba area relevante sira hanesan survey ka estudu viabilidade ruma hodi produz master plan ba projetu fiziky, hanesan Dili Urban Plan. Iha reuniaun han kalan ne’e, partisipa mós husi Diretór Nasional Peskiza no Estatiska (DNPE), Sr. Immanuel de Araujo Mendonca, ne’ebé sai hanesan kandidatu forte ida ba bolsa estudu husi Governu Japoneze nian, no hein deit atu aranka ba halao nia estudu iha Universidade Asia Pasifika bainhira situasaun pandemia komesa mos ona, no sei ba halao nia estudu relevante ho papel MTCI nian.

Mídia MTCI