Iha tinan 2021 ne’e, Ministériu Turizmu, Komérsiu no Indústria, liu husi Turizmu Komúnitariu no Kulturál, realiza no lansa tiha ona grupu trabalho no konsellu konsultivu ba iha projetu suco pilotu turizmu komunitáriu iha suco lima (5) ne’ebé kompostu husi Munisipiu Viqueque, Baucau, Ainaro no Aileu.

Desizaun implemantasaun projetu turizmu komunitáriu iha suco lima (5) ne’e liu husi prosesu; pre-estudu viabilidade, rejultadu estudu, sensibilizasaun, maka to’o iha implementasaun grupu. No agora dadauk hakat ona ba iha faze avaliasaun proposta husi kada suco liga ho projetu pilotu suco nian ba dezenvolvimentu ne’ebé maka sustentabilidade.

Ho nunee iha loron Tersa-feira, 27 Jullu 2021; ekipa téknika sira ne’ebé sai hanesan pontu fokál ba iha kada suco sira ne’e, hala’o aprezentasaun kona-ba progressu husi kada suco nian ba Ministru Turizmu Komérsiu no Indústria, Dr. José Lucas do Carmo da Silva, ho Vise-Ministra Turizmu Komunitáriu no Kulturál, Dra. Inácia da Conceição Teixeira, ne’ebé akompaña mós husi Diretór Jerál Turizmu no Diretores Nasionál ho asesores sira.

Ho aprezentasaun ne’e, aleinde téknika sira aprezenta progressus, sira hato’o mós kona-ba proposta husi kada suco ne’ebé maka sei liu iha prosesu avaliasaun, hodi nunee bele hetan apresiasaun husi Ministru no Vise-Ministra ba programa refere nia kontinuasaun.